因為由細到大都有哨牙問題，由細到大都比人叫哨牙妹叫到大，屋企環境又唔係話好好，就算細個睇香港牙科保健啲牙醫都話有需要箍牙矯正下棚牙，除左外觀之外，牙醫話棚牙咁哨咬野都咬得好差，長遠落去可能影響埋成個面型，都唔敢開聲叫屋企人比我去箍牙。
所以箍牙呢件事由細到大都係我嘅wishlist 入面。到左2019年，我儲左少少錢，就去左搵牙醫箍牙。咁當然，Budget 唔多嘅我只能推而求其次搵深圳一間大型牙科診所處理，名就唔開喇，不過大家都一定會識。
(睇返棚牙真係有啲嚇人)
而我棚牙因為係唔夠位生所以係需要剝牙先可以矯正到，咁唔洗講大家都知個幾年疫情封關，我就剝左四隻小臼齒同覆左兩次診就開始因為封關問題無得再過關覆診。點知一封封左三年，我棚牙就越黎越衰。中間都有打過微信問過有咩方法可以處理，但跟開我case個主任級王醫生都話唔返上去覆診都好難有咩幫到我, 諗住上年開返關之後我就即刻上返去深圳嗰間cool牙診所睇吓點樣搞啦，佢仲喺度開門做生意。但係點知佢哋話已經過咗咁耐就俾晒錢唔會再跟㗎啦，之前封關你上唔到嚟覆診係你嘅事，如果要搞返嘅話開咗個天價俾我。咁我梗係唔就範啦，亦都覺得佢哋醫德有問題，你睇死我肉隨砧板上。於是急急腳返番香港睇牙醫睇吓有冇得搞啦。
由於我無錢，揀左最平嘅傳統牙箍，鐵線同粒粒放咗喺口入邊已經超過兩年，開始有鬆脫成日慘到牙肉吉親牙肉口腔等情況。同埋最恐怖係棚牙越箍越哨，直情有少少突出黎，越黎越醜樣。
痛我都可以忍下，但對住棚日日都會變化嘅牙，而且因為剝左牙啲牙有空位，我每次食野都驚會啲牙唔太受力會再衰啲。
其實中間都有試過想係香港搵一個可以幫我嘅醫生。但係搵咗好幾間診所，都因為我嘅情況係已經剝咗牙，係返箍，好多醫生都唔敢接或者叫我直接搵專科醫生。我都有試過搵專科醫生，但係報咗個廿萬嘅天價箍牙價錢真係負擔唔起。
(又難怪人地唔肯接手我棚牙…)
(呢張已經唔算最誇張)
最近轉左新工，其中一位同事都係返箍( 佢係小學時箍過大個左嫌唔夠靚再箍)，見我棚牙咁嘅情況，就介紹左尖沙咀家X牙科中心比我，佢有矯齒科專科牙醫，仲有得分期，加上轉左新工加左人工又可以負擔多少少，咁就即刻打去預約啦。
去到牙科診所之後，先由全科牙醫檢查一次先, 不過醫生望左一下已經話情況幾緊急，要即時轉介同一間診所嘅箍牙專科醫生。 箍牙醫生先係詳細咁樣影晒所有x ray , 包括口腔X-Ray，頭骨側面X光片，仲有電腦掃描，原因係醫生話通常隔咗咁耐無去適當跟進的牙箍，可能已經令到牙腳行錯咗方向，所以要睇一睇究竟牙腳係咪仲係健康先。
結果一照出嚟真係好驚嚇，發現原來因為冇定期覆診及調較，搞到牙腳不受控制地向外拉而突出左牙骨部份，亦都係呢個原因所以會感覺越嚟越哨牙，門牙仲有啲牙肉萎縮嘅情況出現。醫生即刻幫我做牙齒生命檢查睇睇嗰幾隻受影響嘅門牙有冇神經線壞死嘅跡象，最壞情況可能要杜牙根或者拔牙，真係嚇死，好彩結果暫時都無事，隻牙仲未需要額外治療。
(可以見到啲牙已經走晒位)
醫生姑娘見我個樣咁呆滯，都好好咁安慰我，其實我有少少嚇到反應唔到。箍牙醫生俾咗我兩個建議。
第一個就係盡快拆晒啲鐵箍，唔好再俾任何外力加喺牙度比佢哋好好休息 ，之後再搵醫生好好地重新處理（但一定會比以前需要更加長嘅時間同埋技巧去執整）。
另一個選擇係依家重新再箍，但係醫生強調起碼需要兩年同埋一定要做到每一個月至個半月覆診一次先可以有圓滿的效果。知道呢個決定比較重大同埋要好大的決心 , 診所都話唔急，叫我好好考慮吓先做呢個決定。
一路以為唔覆診最多進度都係停咗喺度，點知原來會越嚟越衰，又怨恨自己點解咁遲先採取行動。姑娘話就算用返同樣嘅物料喺唔同嘅病人身上，牙齒移動進度或者效果未必會一樣。有時速度會比較慢，可能要加其他工具去幫手，有時速度會唔夠預期太快，又未必係好事，因為牙齒移動得太快側邊啲牙肉牙骨有機會跟不上進度已經牙齒開始有鬆動，牙肉萎縮等情況，呢啲併發症都需要喺情況好初期發生嘅時候作出辨認及有緊急嘅應對情況。
搞到今日咁除左疫情令我返唔到去覆診之外就係貪平，我有比過之前啲X光箍牙醫生睇，本身我個case 都唔易搞，而家仲要搞得比之前更差，不過又咁講，而家香港箍牙醫生比起大陸梗係會貴，但係都比之前嗰間可以負擔，加埋分期都唔係話負擔唔到，又有個醫生定期跟進進展會好好多。
最後決定 – 有得搞唔搞咩? 又唔知幾時開返關，加上日日對住棚牙真係就黎抑鬱。所以終於諗住喺香港好好地處理，而家覆左８次診左右， 見到面形已經正常返，同埋社交正常返，無咁驚mark 大個口。
(無諗過棚牙可以正常返好感動)
(完全無諗過啲牙可以去返正常位)
（個嘴冇咁突囉，棚牙再冇哨出嚟，面形係有明顯嘅改善，呢個我都幾滿意！）
所以都想分享呢段經歷出黎建議大家如果要箍牙，好醫生真係好緊要，仲要佢好肯同你去溝通確保病人同埋cool 牙醫生嘅期望係一樣。或者究竟佢做唔做到你嘅期望。因為始終cool 牙個個都想係靚啲。
同埋唔好好似我咁跨境返大陸箍牙，要佢做到長期跟進住你個case實在唔容易。收錢嘅時候就乜都得，俾晒錢之後就有好多限制囉。如果真係冇錢返大陸都係唯一嘅辦法嘅，不過最好俾錢之前乜嘢都問清楚，白紙黑字唔好俾機會佢走數。不過當然如果佢執咗笠就冇仇報啦。